Լիլիթ Գրիգորյանը կմիանա «Հայ Վիրտուոզներ» միջազգային ակադեմիա-փառատոն 2027-ի դասախոսական կազմին

Ուրախ ենք ներկայացնելու միջազգային ճանաչում ունեցող հայ դաշնակահար, պրոֆեսոր Լիլիթ Գրիգորյանին, որը կմիանա դիրիժոր Սերգեյ Սմբատյանի՝ «Երաժշտություն հանուն ապագայի» հիմնադրամի կողմից կազմակերպվող «Հայ Վիրտուոզներ» միջազգային ակադեմիա-փառատոնի 2027 թվականի դասախոսական կազմին։
Ծնվելով Երևանում՝ Լիլիթ Գրիգորյանը տարիների ընթացքում հաստատել է իր ուրույն տեղը միջազգային դասական երաժշտության ասպարեզում։ Որպես մենակատար և կամերային երաժիշտ՝ նա ելույթներ է ունեցել աշխարհի հեղինակավոր համերգասրահներում, այդ թվում՝ Բեռլինի ֆիլհարմոնիայում, Համբուրգի Elbphilharmonie-ում, Փարիզի ֆիլհարմոնիայում և Ամստերդամի Concertgebouw-ում։
Նրա ստեղծագործական ուղին ներառում է համագործակցություններ միջազգային ճանաչում ունեցող երաժիշտների հետ, բարձր գնահատականի արժանացած ձայնագրություններ և ելույթներ աշխարհի հեղինակավոր երաժշտական փառատոներում։
Իր կատարողական գործունեությանը զուգահեռ՝ Լիլիթ Գրիգորյանը մեծ նվիրումով զբաղվում է նաև երիտասարդ երաժիշտների կրթությամբ։ 2026 թվականի հունվարից նա դաշնամուրի պրոֆեսոր է Ռոստոկի երաժշտության և թատերական արվեստի համալսարանում՝ իր գիտելիքներն ու գեղարվեստական փորձը փոխանցելով նոր սերնդի երաժիշտներին։
Սիրով սպասում ենք պրոֆեսոր Լիլիթ Գրիգորյանին Երևանում՝ «Հայ Վիրտուոզներ» միջազգային ակադեմիա-փառատոն 2027-ի շրջանակում։




Comments