Ջութակահար Էդուարդ Դայանն ընդունվել է Մադրիդի Ռեյնա Սոֆիայի անվան երաժշտական բարձրագույն դպրոց

«Երաժշտություն հանուն ապագայի» հիմնադրամի «Հայ Վիրտուոզներ» ծրագրի կրթաթոշակառու, ջութակահար Էդուարդ Դայանն ընդունվել է Մադրիդի Ռեյնա Սոֆիայի անվան երաժշտական բարձրագույն դպրոց՝ շարունակելու իր մասնագիտական կրթությունը աշխարհահռչակ ջութակահար Զախար Բրոնի դասարանում։

Տարիներ շարունակ լինելով «Հայ Վիրտուոզներ» ծրագրի կրթաթոշակառու՝ Էդուարդը զարգացրել է իր մասնագիտական հմտությունները, ձեռք բերել արժեքավոր փորձ և շարունակաբար կատարելագործել իր երաժշտական վարպետությունը։ Այսօր այս նշանակալի ձեռքբերումը երիտասարդ երաժշտի հետևողական աշխատանքի, նվիրվածության և մասնագիտական աճի հերթական կարևոր հանգրվանն է՝ բացելով նոր հնարավորություններ նրա ստեղծագործական ճանապարհին։

«Երաժշտություն հանուն ապագայի» հիմնադրամը հպարտ է հետևել իր պատանի տաղանդավոր երաժիշտ Էդուարդ Դայանի մասնագիտական առաջընթացին և շնորհավորում է նրան այս կարևոր հաջողության կապակցությամբ՝ մաղթելով նոր նվաճումներ և ստեղծագործական վերելքներ։