top of page

Կարևոր չէ, թե քանի տարի կա քո կյանքում, կարևոր է՝ որքան կյանք կա քո տարիներում. Էդգար Մխիթարյան

Կարո՞ղ ես մի փոքր պատմել քո մասին՝ ինչպես առաջին անգամ հետաքրքրվեցիր երաժշտությամբ:


Կարելի է ասել, որ երաժշտությունը իմ կյանքի անբաժան մասն է ծնված օրիցս։ Մայրս դաշնակահարուհի է, իր նվագելն ու պարապելը միշտ աչքիս առաջ է եղել։ Բացի դրանից մենք բավականին մեծ ձայնադարան ունենք, և տանը միշտ դասական երաժշտություն է հնչել, նաև շատ էինք հաճախում համերգների …Երաժշտական դպրոց ընդունվեցի 7 տարեկանից։ Գործիքի ընտրության հարցը որպես այդպիսին չի էլ դրվել. դաշնամուր։


Ինչո՞վ ես սիրում զբաղվել, երբ չես նվագում: Կա՞ որևէ հոբբի կամ զբաղմունք, որը քեզ ուրախություն է պատճառում: Ինչպե՞ս ես սիրում հանգստանալ դասերի կամ երկար պարապմունքներից հետո:


Եթե դու պրոֆեսիոնալ երաժիշտ ես ուզում դառնալ, առավել ևս դաշնակահար, դու պիտի պատրաստ լինես օրվա մեծ մասը տրամադրել պարապելուն, ազատ ժամանակ գրեթե չի մնում։ Ես հաշտվեցի այդ մտքի հետ, և հիմա պարապելու ընթացքը ինձ ևս ուրախություն է պատճառում, վայելք, բավարարվածություն։ Իսկ ազատ ժամանակ սիրում եմ կարդալ, ընկերներիս հետ շփվել, լողալ, հեծանիվ քշել, զբոսնել միայնակ` մտքերս կարգավորելու, և իհարկե, ունկնդրել երաժշտություն։

Ունե՞ս սիրելի կարգախոս կամ ասացվածք, որը քեզ ոգեշնչում է քո կյանքի ճանապարհին:


Այո, մի քանիսն են.«Աշխարհը քոնն է», «Կյանքը մեկն է, և պետք է այն ապրել արժանի», «Վերջիվերջո, կարևոր չէ, թե քանի տարի կա քո կյանքում, կարևոր է՝ որքան կյանք կա քո տարիներում»:


Ո՞րն է ամենահետաքրքիր կամ սիրելի վայրը, որտեղ երբևէ եղել ես, և ինչո՞վ է այն առանձնահատուկ քեզ համար:


Հետաքրքիր վայրեր շատ կան թե Հայաստանում, թե Հայաստանից դուրս։ Շատ եմ սիրում, օրինակ, Դիլիջանի կոմպոզիտորների միությունը, որը Դիլիջանի ազգային պարկի մի մասն է, հրաշագեղ բնության գրկում է գտնվում, իսկ բնությունը ոգեշնչող է։ Սիրում եմ Կապանը։ Հատկանշական վայրերից է ինձ համար Սերգեյ Փարաջանովի թանգարանը, ում յուրահատուկ հանճարեղությունը հետաքրքիր էներգետիկա է հաղորդում տուն-թանգարանին, թեպետ նա այնտեղ չի ապրել։


Եթե կախարդական ուժ ունենայիր, ո՞րը կլիներ և ինչպե՞ս կօգտագործեիր այն:


Եթե կարողանայի ժամանակ առ ժամանակ կանգնեցնել ժամանակը, բավականին գործ կհասցնեի անել։


Որո՞նք են ապագայի քո նպատակներն ու ձգտումները որպես երիտասարդ երաժիշտ: Քո մտքում երազած նախագծեր ունե՞ս։

Այո, մեծ ծրագրեր ու բարձր նպատակներ ունեմ։ Մեծագույն նպատակս է դառնալ պրոֆեսիոնալ դաշնակահար, նշանավոր կոմպոզիտոր և հնարավորինս պիտանի լինել հայրենիքիս։


Քո որ հատկանիշն է, քո կարծիքով, օգնել քեզ հաջողություններ գրանցել երաժշտության մեջ և կյանքում:

Կարծում եմ՝ դա տաղանդն ու աշխատասիրությունն են, որոնք բացահայտեցի ուսուցիչներիս շնորհիվ։



Կարո՞ղ ես նկարագրել «Երաժշտություն հանուն ապագայի» հիմնադրամի դերը քո երաժշտական զարգացման մեջ և ինչպես է այն քեզ աջակցում:


«Երաժշտություն հանուն ապագայի» հիմնադրամը ինձ զարգացման մեծ հնարավորություն է տալիս։ Վարպետության դասեր, օտար լեզվի դասընթացներ, բեմական փորձ, թանգարանային այցելություններ, հետաքրքիր նախագծեր, համերգներ, ընկերություն հայ պատանի տաղանդավոր երաժիշտների հետ, ծանոթություններ բեմերը նվաճած երաժիշտների հետ` այս ամենը, բնականաբար, չի կարող չնպաստել իմ երաժշտական աճին։ Շնորհակալ եմ հիմնադրամին։


Կա՞ն որոշակի արժեքներ կամ սկզբունքներ, որոնք դու կարևոր ես համարում և որոնք առաջնորդում են քո գործողություններն ու որոշումները:

Բարություն, ճշմարտախոսություն, նպատակասլացություն, հայրենասիրություն, անձնազոհություն, հանճարեղություն։



Ո՞ր հատկանիշներն ես ամենաշատը գնահատում քո ընկերների և շրջապատող մարդկանց մեջ:


Ինձ համար կարևոր է, երբ մարդն իր առաջ նպատակներ ունի, ծույլ ու ձրիակեր չէ, չի պատրաստվում ապրել անհետաքրքիր, անիմաստ կյանքով։ Ընկերը նա է, ով միշտ պատրաստ է քեզ օգնության ձեռք մեկնել և աջակցել անհրաժեշտության դեպքում։

Դաշնակահար, 16 տարեկան

2014 - 2023 / Երևանի Ֆ. Նանսենի անվան թիվ 150 հիմնական դպրոց

​2015 - 2023 / Երևանի Ս. Ասլամազյանի անվան թիվ 1 երաժշտական դպրոց, դաշնամուրի բաժին, ուսուցիչ՝ Նաիրա Դանիելյան

2023 - առ այսօր / Երևանի Պ. Չայկովսկու անվան միջնակարգ երաժշտական մասնագիտական դպրոց, ուսուցիչ՝ ԵՊԿ պրոֆեսոր Սերգեյ Սարաջյան


​Երաժշտությամբ զբաղվում է 7 տարեկանից, 9 տարեկանից սկսել է ստեղծագործել, 2018թ.-ից զբաղվում է նաև կոմպոզիցիայով` Մարիա Ղուշչյանի դասարանում:աաаրա


141 views0 comments

Comments


bottom of page