Արամ Խաչատրյանի տուն-թանգարանում հոկտեմբերի 27-ին, 28-ին և 29-ին տեղի ունեցան «Երաժշտություն հանուն ապագայի» մշակութային հիմնադրամի կրթաթոշակառուների համերգները՝ «Շնորհալի Հայաստան» խորագրի ներքո, որոնք եզրափակիչ ակորդ հանդիսացան մեկ ամիս շարունակ տևող «Երաժշտություն հանուն ապագայի» դասական երաժշտության ակադեմիային: 

Հոկտեմբերի 1-30-ը Երևանում կայացավ «Երաժշտություն հանուն ապագայի» Դասական երաժշտության ակադեմիան։ Այն կազմակերպվել է «Արմենիա» միջազգային երաժշտական փառատոնի շրջանակում՝ «Երաժշտություն հանուն ապագայի» մշակութային հիմնադրամի նախաձեռնությամբ, Մշակույթի աջակցության եվրոպական հիմնադրամի և Հայաստանի պետական սիմֆոնիկ նվագախմբի աջակցությամբ։

Ակադեմիայի շրջանակներում հիմնադրամի կրթաթոշակառուների, պատանի դաշնակահարների և ազատ ունկնդիրների համար վարպետության դասեր են անցկացրել 20 աշխարհահռչակ երաժիշտներ և պրոֆեսորներ, այդ թվում՝ հանրահայտ դաշնակահարներ Պավել Գիլիլովը, Վլադիմիր Օվչիննիկովը, Ռեմի Ժենյեն, Ժան-Պոլ Գասպարյանը, ջութակահարներ՝ Գիլ Շահամը, Դորա Շվարցբերգը, Գրաֆ Մուրժան, Ֆումիակի Միուրան, թավջութակահարներ Սթիվեն Իսսերլիսը, Ֆելիքս Կորոբովը, Դմիտրի Յաբլոնսկին, ֆլեյտահար Մաքսիմ Ռուբցովը, և այլք։ Նրանք բոլորը շատ բարձր գնահատեցին այսպիսի կրթական միջոցառումների իրականացումը և համոզմունք հայտնեցին, որ պատանի կատարողները կարող են մեծ բարձունքների հասնել, քանի որ գտնվում են այս հիմնադրամի ուշադրության կենտրոնում: Վարպետության դասերը կազմակերպվել և անց են կացվել Երևանի Պյոտր Չայկովսկու անվան միջնակարգ երաժշտական մասնագիտական դպրոցի Տատյանա Հայրապետյանի անունը կրող համերգասրահում:

Մեկ ամսվա ընթացքում Ակադեմիայի շրջանակներում կազմակերպված վարպետության դասերի յուրօրինակ ամփոփում-հաշվետվությունն է «Շնորհալի Հայաստան» համերգաշարը: Երեք համերգների ընթացքում պատանի երաժիշտները ունկնդրի դատին ներկայացրեցին իրենց մասնագիտական հմտություններն ու նաև Ակադեմիայի շրջանակներում վարպետության դասերի ընթացքում ստացած գիտելիքները:

Համերգի ավարտին պատանի երաժիշտներին Ակադեմիայի վարպետության դասերին մասնակցելու կապակցությամբ «Երաժշտություն հանուն ապագայի» մշակութային հիմնադրամի հոգաբարձուների խորհրդի նախագահ և Հայաստանի պետական սիմֆոնիկ նվագախմբի գլխավոր դիրիժոր և գեղարվեստական ղեկավար Սերգեյ Սմբատյանը հանձնեց վկայականներ: