ԿԼԱՐՆԵՏԻ ՎԱՐՊԵՏՈՒԹՅԱՆ ԴԱՍ ՖԱԲՐԻՑԻՈ ՄԵԼՈՆԻԻ ՀԵՏ
15 Օգոստոսի 2022
Օգոստոսի 16-ին հիմնադրամի կրթաթոշակառուների համար վարպետության դաս կանցկացնի հայտնի կլարնետահար Ֆաբրիցիո Մելոնին:
Օգոստոսի 16-ին (երեքշաբթի), ժամը 12։00-13:00 Երևանի Ալ․ Սպենդիարյանի անվան երաժշտական մասնագիտական դպրոցում հիմնադրամի կրթաթոշակառուների համար վարպետության դաս կանցկացնի հայտնի կլարնետահար Ֆաբրիցիո Մելոնին:
Նույն օրը նա ելույթ կունենա «Առնո Բաբաջանյան» համերգասրահում «Սիմֆոնիկ Երևան» միջազգային երաժշտական փառատոնի շրջանակներում:
Վարպետության դասերը բաց են ունկնդիրների՝ երաժշտական հաստատությունների սաների համար: Դասերի ընթացքում որպես պասիվ ունկնդիր կարող են ներկա գտնվել նաև այն երեխաները, որոնք չեն հաղթահարել կրթաթոշակի համար հայտարարված մրցույթը։
___
Ֆաբրիցիո Մելոնին 1984 թվականից Միլանի Լա Սկալա նվագախմբի և ֆիլհարմոնիայի կլարնետի առաջին մենակատարն է։
Տասնյակ ազգային և միջազգային մրցանակների դափնեկիր Ֆաբրիցիո Մելոնին վարպետության դասեր է տվել Փարիզի երաժշտական կոնսերվատորիայում, Շվեյցարիայի առաջադեմ կոնսերվատորիայում, Տոկիոյի համալսարանում, Նյու Յորքի Մանհեթենի դպրոցում, Չիկագոյի Հյուսիսարևելյան Իլինոյսի համալսարանում, Տրևիզոյի Կա Զենոբիոյի ակադեմիայում և այլ ուսումնական հաստատություններում: